2025-8-26 紅磡閒遊

8月 30, 2025

廢話：

這日晚上要到理工大學走一轉，日間順勢閒遊一下紅磡，走走幾個之前未去過的地方。

乘巴士到德民街下車，先到附近的和黃公園🌳。80年代政府計劃在這個區域建臨屋區，但大地主怕影響樓價就跟政府商量另一個方案，遂出資建成這個公園，並於1991年交政府管理，只冠名「和黃公園」。公園內仍存在被剷走的大環山殘餘部分(15米)，其位置應該就是在最高那個亭的山坡，在龜池旁邊。與一般康文署公園不同，入面的景點名比較chok🤣，同埋有好多石獅子，連公廁門口都有🤭。

逛完公園往家維邨方向走，途中經過聖母堂⛪便順便進去參觀一下。聖母堂於1959年祝聖啟用，至今66年歷史。同區附近還有鼎鼎大名嘅紅磡觀音廟，一中一西，任君選擇，或者契哂兩邊都得🤭，梗有一個靈🤭。

之後走到差館里，本想看看傳聞中的後巷富婆，但走遍整個後巷都不見，可能已經搬走左。於是直接去觀音廟🛕。此廟由紅磡三約於1873年籌建，鄰近家維邨（前身為紅磡約），已有超過150年歷史，拍得住大坑蓮花宮。據聞此廟於1941年日本來犯時經歷兩度轟炸，附近的建築毀於一旦，唯獨此廟無事，唔通真係咁堅🤔？我來的這日有泰國旅行團到訪參觀，相當熱鬧，香火極為鼎盛，影左一陣相啲煙已經攻到我頂唔順要著草😝。

參觀完觀音廟到一旁的家維邨🏘️看看。1984年入伙，已有超過40年歷史，前身為紅磡邨（現時的紅磡邨原為大環山邨），於80年代翻新後易名家維邨，取名自香港房屋協會創辦人之一：張有權（其筆名是「家維」）。家維邨的設計幾特別，樓房圍在一起像圍村一般，屋苑出口只向內通往中央的小公園，並不能直通外面，據說這種設計是為了增加匪徒犯案後逃脫的難度，從而加強屋邨的保安。究竟家維邨治安係咪真係好啲🤔？

接著，穿過家維商場，沿寶其利街走到寶石戲院大廈，先到附近的日式小店—三河屋吃午餐，價格親民，品質也不錯，值得幫襯。午餐後到寶石戲院看電影🎥。戲院1970年落成，分別於1995年及2012年翻新，聰明地保留了舊式戲院的風貌及人手畫飛嘅傳統，可能係尼種差異化令佢成功生存至今。刻意入去睇戲感受一下傳統戲院嘅氛圍，可惜佢全日淨係做「鬼滅」一套戲。筆者本身冇追開，好在劇情夠簡單，朝早惡補一下劇情已經明哂佢套野講咩。感覺套戲麻麻地，坊間過譽了，太過矯情，打鬥畫面成日有停頓位，上弦鬼叁個回憶感覺好冗長，搞到個節奏好怪，當爽片咁睇又唔夠爽，正邪角色性格亦有點太一面倒，如果唔係入寶石戲院基本上唔會睇尼套野😅。

看完電影到紅磡站參觀之前預約好的「站見」展覽🚅。展覽設於站內已經停用的舊月台。筆者以前常常到這個又焗又熱的月台乘車，而其中展出的「烏蠅頭」列車亦勾起了不少回憶。參觀完展覽獲贈港鐵的紀念車票，晚上到理工大學晚飯，完結行程豐富的一天。